"QUELQUES SOUVENIRS DE FOOTBALL" par PAUL GILLES , ancien joueur du club et fervent défenseur de la langue wallone.
MES SOVENANCES DI FOTBAL...
Come tos les gamins di mi-y-âdje, dj'aveut dîj'ans en 40, dj'a apris à "choter" dins l'coû dè scole èt su les vôyes. Dè l'guêre, pupont d'balon d'caoutchouc.On s'sièrveûve d'one vîye bale di mousse ou t' tènis.Mwins côps on-z-è fieûve one avou dè papî èt dès-élastiques discôpés dins one tchambe à aîr.Lès rékes èstîn' dès pus sémpes: dès "èns' " èt dès "op sêk" : c'èst qu'nos strupîn' on fameûs côp tos lès mots anglais. Et on discuteûve à mwârt là d'ssu, qui l'maisse à mwints côps d'vu s'è mèler.Après li scole, à saquantes, nos ocupîn'li vôye.I gn-aveûve qui tofêr one atèléye qui passeûve ou dès vatches qu'on rawinr'neuve dau pré.
Dj'a surtout apris à djouwer , en pension à Malonne.Au mwins on côp par samwinne si nén deûs, li djwèdi èt l'dimègne, on monteûve au "plateau" èwou ç'qu'i gn-aveûve one véntin.ne di p'tits tèréns. I faleûve qu'i plovuche fwart po-z-î chaper.C'èst dandjereûs po ça, qui saquants-ans pus tard, Djadoul èt l'notaire Dèboutche, ont sîyî m' pa po m' fé djouer. Mi pa ni s'aveut jamais lèyî à dire. Nos-avîn' pierdu mi soû èt m'man.Mi pa ni v'leûve nén qui dji m'faîye "croquer" au fotbal, d'ostant d'pus qui dji n' èsteuve nén dè pus pèsant. A c'momint là, vos-avîz dès djouweûs come Georges Havelange, Cyrille Duchêne, lès Denil, Maurice Herson, lès fréres Gouy èt Claude...ça n' m'a nén èspêtchi dè djouwer saquante côps à catchète di m'pa. Li problème c' èsteuve po catchi lès solés èt lès moussemints. Li dimègne, po lès dèplacemints, saquants djouweûs ènn'alîn' en auto,lès-otes èt lès suportêrs, montîn ' à camion da l' Suys ou da l'Faisan èt évôy...
( suite au prochain numéro...)
CADETS
CADETS
visiteurs
visiteur en ligne
35 membres
Haut
